Liabi Urgrossmama, liaba Urgrosspapa,

machen eu ka Sorga um üs, weil es goht üs guat.

Miar sind numma Kinder vo Länder, oder vo Staata, sondern Kinder vor Welt, weil miar üs bewusst wora sind, dass s'Handla vo jedem einzelna jeder andere beiflusst. Im Moment erleben ihr es no i dera Form dass dr Scheiss wo an baut alli andera us dr Bahn wörft, aber miar erleben es numma so. Bi üs entstoht erna Züg gär ned erscht, weil üseri Liabi üs verbindet, und miar drum immer wössen wias wem wo o immer goht.

Üsers Gfühl füranand lot erscht gär numma zua dass miar so leben, wias ihr jetzt im Moment noch tuan, weil miar dr Schmerz vom andera spüren, wemmer ihm eppis atuan. Miar hen drum o numma Religiona i eurem Sinn, weil mir üs bereits alli als Teil vom Ganza begrifen und spüren und glichzitig als Ganzes selber, und weil miar wössen, dass miar alli vom glicha Ort kon, dörf bi üs jeder das globa, was er am liabschta globa well.

Eigentlich wössenders jo alles scho selber, aber bi eu isch es no anderscht weil ma hät eu igredet, dass ihr ned guat gnuag sind, dass eu niamert so ha well wia ihr wörklich sind und es alles nur an schöna Traum isch. Aber miar sin höt do zum eu säga dases nüt normalers git.

Wia isches drzua ko? Ab dört wo ihr jetzt ston isches immer schlimmer wora, und irgendwenn hemmer afach ufghört üs selber belüga. Miar hen ufghört so tua als wär alles in Ordnig wenns üs eigentleg scheisse goht. Miar hen ufghört so tua als müasst ma d'Schnorra heba und alles afach uf sich ne und durd Gegend schleppa, als gäbs kan anderi Wahl.

Miar globen numma a euri Usreda, wieso und warum ma sich ned voll und ganz usleba dörf, oder dass irgend eppert anderscht besser wass als miar selber was ma zmacha hät. Miar hen üs afach so si lo wia miar si wen, und plötzlich hät alles funktioniert, weil jeder automatisch dört glandet isch, woner o hi ghört.

Miar zwingen üs drum zu nüt meh, und miar lon üs gad erscht recht numma zu eppis zwinga womer kan Bock druf hen. Genaugno isch dr einzige Grund für üs no öberhaupt eppis z'macha der, das miar üs i em Moment nüt geilers vorstella kon z'macha, und genau darum passieren die unglaublichschta Sacha, weil miar üs selb numma im Weg stohn. Und weil jeder nur no macht waser liabt, fehlts üs im leba a nüt me, und miar kon mit viel weniger us.

Miar hen o ka Regieriga meh, so wia ihr das kennen, miar hen nur no a Gruppa Menscha, wo da Lüt helfen, das z'finda und z'tua, was sie am liabschta machen und sind, und alles organisiert sich vo dört us, ohni dass miar no gross was macha müassten.

Bi üs kunt ned wia bi eu zerscht d'Arbeit und denn s'Vergnüaga, weil för üs d'Arbeit s'Vergnüaga selber isch, und es isch weil miar üs zerscht frogen "was findi grad geil zum macha" und es denn o direkt tuan, ohni Umweg, ohni Hindernis, ohni Astrengig, ohni Müah. Und darum bringen miar Züg hera wo für eu im Moment no unvorstellbar isch, und viel schneller, als ihrs für möglich halten.

Viellicht globend ihr üs ka Wort, und es isch für üs ok. Für üs machts eh kan Unterschied, ob ihrs globen oder ned, weil für üs isches scho lang ganz normala Alltag, so wia für eu zur Poscht go und gi Znüni ne. Alles was miar wen isch eu zaga dases got, dases normal isch, das mir üs jeda Tag druf verlon und dases funktioniert, und dass s'schönst am Leba selb isch, das mas sich ussuacha ka - ned zletscht weil mas sich sowieso immer ussuacht, o wenn mas ned immer schnallt.

Und wenn ihr eu nur für an Moment amol erlauben alles z'vergessa was ma eu beibrocht hät, i eu selb losen und nur em Traum folgen, era Liabi, era Leidaschaft i eurem Leba, was o immer es isch, i jedem Moment, so guat ihrs kon, denn wörd eni Begeisterig und Liabi eu immer genau dört herstüra, wo ihr si muan, und ihr wören i em Moment immer genau das ha, was ihr bruchen, zum genau das si, was ihr am liabschta sind: eu selber. Ohni Usreda, ohni Vorwänd, ohni Begründig. Und nüt anders wünschen miar eu vo ganzem Herza.

Alles Liabi,

euri Urenkel.

Lukas Mayer ist GrossEnkel am MorgenLand-Festival